股海實戰： 昆侖能源起飛最後召集

今日係即月期指結算，話咁快一年又過咗十一個月，展望十二月份，由於今年內銀新增信貸額度已用得九九十十，要等明年初先至上到新銀彈，加上嚟緊又係聖誕及新年假期，以及基金年結，估計恒指回落至22,000點水平後，暫未有再大跌之虞，但市況將以上落為主，炒股唔炒市。

尚有不少新股在趕搭今年尾班車，粗略估計，今年起至上周五止，已有73隻新股掛牌，表現最好嘅3隻新股分別係海東青新材料（02228）、進業控股（08356）及雷士照明（02222），均較招股價升超過一倍，可見新能源概念確有其優勢。

嚟緊幾個月，「十二五」規劃以及中央一號文件等概念不愁炒作。幾可肯定，政策將繼續致力推動農村改革，農業概念長炒長有。上周有市場消息指，《農業裝備產業發展政策》意見稿已完成，預計農機產業將獲得全方位支持，包括獲得稅務優惠。

講到農機，十月中旬本欄推介的第一拖拉機（00038），最近有高層人事變動，相信暫對公司影響不大。論估值，目前尚不算太貴，部署明年核心持股，此股誠屬實力之選。

長汽待回調再考慮

睇番汽車股，上周見到鑊氣，惟長城汽車（02333）上周五突然拉閘，原來係有待宣布出售房地產及建材銷售業務售予母公司。公司着手去除非核心業務，套現支持汽車業務發展，應可視為好消息，建議待回試10日線26.2元承接，再作考慮。

上周五另一隻久違嘅異動股係昆侖能源（00135），曾高見11.16元，收報10.7元，升5.11%，成交10.95億元，已一連重上多條平均線，且扭轉了十月上旬以來嘅下降趨勢，亦係自去年十二月初配股集資後，最大單日成交金額。

阿莊仲好記得，去年十二月初昆侖透過美銀美林進行配股集資，配股價8.27元，完成後股價反覆向上，直至一月中旬見高位12元，才現急速回吐，落到二月上旬低位8.2元才告回穩，其後十個月股價維持喺9至10元水平上落，表現跑輸大市，唔少捧場客都叫苦。

不過，從昆侖今年上半年業績理想，近年又落實多項下游投資項目，上周五落實斥資4億元參與合營河北華港增資計劃，成效將逐步體現喺業績上，相信橫行悶局不會為時太久。上周五其股價異動，可以視為召集訊號，成功突破11元水平，向上目標可見13元，跌穿9.9元止蝕。

戰報

東方表行（00398）

冼金基在本月十九日推介東表時，低位才4.6元，上周四創出五十二周高位5.57元，最多升21%，真係唔講得笑。

中國龍工（03339）

上周一姚午齊指龍工有力重返高位，當日低位4.31元，上周五股價高見4.82元，累積升幅11.8%，果然眼光夠準。