陸東：港股現價好抵買

有「星級分析員」之稱的瑞銀外部顧問陸東表示，現時港股估值合理，散戶可以入市，同時維持今年恒指合理值27,500點，但相信出現機會很微。而二○一一年的恒指合理值為33,000點，其走勢形態為「高、低、高」。他又指出，未來本港樓價仍然高企，惟下跌風險有限。

估明年恒指見33000

由於歐洲債務危機有惡化迹象，導致上周港股走勢變得陰霾重重，但陸東直言：「如果愛爾蘭危機真係爆咗，對港股梗有啲壞影響，但股市無可能永遠都係升，當中一定會有波幅出現。我相信明年好多企業會有15至16%嘅現金盈利增長，但現時恒指市盈率只得十三、十四倍，依家入市買股票，只會有買貴，但唔會買錯，值博率好高。」

對於明年港股看法，陸東經計算後得出來年恒指合理值為33,000點，港股走勢將為「高、低、高」。他解釋：「依家我淨係見到有好多熱錢流入港股，但就唔見有流出，所以熱錢會令恒指見第一個『高位』；但未來內地銀行會繼續收緊信貸，於是令恒指出現『低位』；而最後一個『高位』會否高於第一個，咁就要希望明年第三季企業業績比預期中更加好嘞！」

遏炒樓措施效力有限

面對近期政府推出物業買賣額外印花稅以壓抑樓市過熱，陸東直指「效力有限，未來私樓好難有得跌！」他續稱：「董建華時代，每年有25,000個新增樓宇供應，但依家就只得7,000至8,000個，新樓的供應量少自然造成樓價昂貴。」

陸東估計，地產市場最快於二○一三年或二○一四年才會出現較大風險。

至於投資建議，陸東估計，明年內地銀行新增貸款額約6萬億元人民幣，認為投資內銀股勝於本地銀行股，原因是內銀股的市盈率實在太過便宜，而且賺錢能力非常之高。他笑言：「內地銀行簡直就係世界第一流嘅銀行，佢哋一啲都唔蛋散，我最鍾意就係招商（03968）同埋建行（00939）。」他稱，現時內需股估值便宜，內房股仍具國策上風險，以及看淡航運股及工業股。