遏炒一刀切 治標不治本

上個禮拜政府出重招打壓樓市，唔夠一個禮拜時間，就已經打殘樓市，仲快手過以色列四十幾年前嘅「六日戰爭」。啲高官仲「叻唔切」出嚟展示勝利，以為可以領功。其實，以往買唔到樓嘅小市民，最怨恨嘅就係政府喺樓價高企之時，都唔肯復建居屋，為小市民提供了一個私人市場以外嘅置業良方、亦都為樓市降溫。但係政府冇好好反省一下，反而採用打壓方式出嚟以博掌聲，Paul少睇到都覺得幾無奈。

仇富消氣 於事無補

今次政府出招，回響當然好大，Paul少觀察咗成個禮拜，都見到市場對件事有唔少爭議，無論贊成或者反對都有。但係唔知點解，有啲人就鍾意將件事塑造到好似係小市民與地產商之戰咁，最後政府伸出佢嘅「正義之手」，幫小市民打倒巨人歌利亞，替被剝削嘅小市民出咗啖氣。呢種思維其實真係好有問題，亦都相當危險。

業主受綁 換樓非易

今次政府落重藥，對地產商嘅營銷當然會有影響，但同樣有唔少小市民「受傷」。舉個例講，今次咁突如其來嘅措施，令到投資者群起撻訂，其實亦令到一啲已經諗住套現換樓或者離場嘅業主，一時間不知所措。雖則可以「殺訂」，有十萬八萬落袋，但係根本就唔夠彌補樓價嘅跌幅；而且之後再冇咁容易出貨，換樓計劃亦都難免會被打亂。

樓價回落，好多之前未有能力上車嘅小市民，可能真係會拍爛手掌，但掉轉頭講，我哋唔可能話呢啲有樓在手嘅用家，或者係投資物業嘅人，係「自招惡果」，佢哋同樣都係小市民，點可以對佢哋抱住「批鬥」嘅心態呢？

如果大家覺得樓價升得快係唔正常嘅話，咁依家呢種不顧後果嘅人為調控，究竟又係唔係扭曲市場呢？要調控市場，點解唔正正經經從供應着手呢？

復建居屋 方為正道

Paul少已經不下於一次講過，居屋係解決現時供求失衡一個較為理想嘅方法。其實由居屋最初出現開始，已經有好大班想置業嘅小市民，冇足夠財政能力去負擔私人樓，結果居屋就幫咗佢哋一把，慢慢進化成中產，成為私人市場嘅動力。

政府放棄用呢種有長遠眼光同埋合乎市場利益嘅方法，反而用呢種唔公平嘅打壓措施去調控樓市，最終都受害嘅，未必只係地產商同埋炒家，而係所有參與喺樓市嘅人，同埋同地產業相關嘅行業。一個殊不簡單嘅問題，又點可以用一個咁簡單嘅方法解決呢？