天降百萬怎善用？

有否想過自己有一天中了六合彩，或天降橫財得到100萬？相信不少人都幻想過，突然間有100萬，自己會點利用它。有人想去旅行，有人想錢搵錢，有人想繼續進修……至於那100萬用得合適與否，能否達到目標，就不是每個人都想得透徹，反正大家都抱着「都係不勞而獲所得嘅錢」、「用完罷就」的心態。

把100萬全部儲起或者拿來投資，雖然符合理財增值的目標，但適當的獎勵也許是很好的充電劑，幫助我們努力向前，究竟大學生們會如何利用這個「天降百萬」？今期《百萬大道》透過街頭直擊，了解一下大學生的理財智商，以及請來恒生管理學院院長兼金融學教授蘇偉文分享他的想法，為同學們指點迷津。

Alvin 樹仁大學新聞系三年級學生

40萬買低風險股票

「在香港得100萬真係唔多！如果我有100萬，其實真係做唔到啲咩！有1,000萬又唔同講法喎！如果我真係突然間有100萬，我可能會用10萬蚊去旅行，或者買自己鍾意嘅嘢先！點都要滿足吓自己先嘅！」

「然後剩低嘅50萬就會儲起佢，其餘嘅就拎去投資風險低嘅股票，希望可以賺番少少，保值嘛！通脹又係咁升，如果唔拎去投資，容乜易擺多幾年就無晒呢？」

蘇偉文評：後生勿太保守

「用10萬去旅行？畢業旅行都唔使用咁多錢啩？儲起50萬咁多，只係用40萬去投資，呢位同學似乎保守咗啲喎！我建議同學可以用多少少錢去投資都唔怕，反正後生，蝕得起，之後又唔喺搵唔番！後生仔應該留番啲錢用嚟讀個Master（碩士學位），進修吓咪幾好！」

Stephanie 樹仁大學新聞系二年級學生

75萬美留學增值

「我就會將舊錢分開兩部分！由於我自己唔係好識得投資，我會拎25萬去搵投資顧問幫我投資一啲高風險嘅產品。如果要買股票，就會買滙控（00005），同埋一啲與黃金相關嘅產品。反正都係不勞而獲得番嚟嘅錢，高風險輸晒都唔怕，我搏到盡㗎喇！另外，我會預留75萬去美國紐約留學，讀兩年ART，我會好畀心機咁讀書，為自己增值！」

蘇偉文評：餘錢可買股

「讀書增值係一個明智嘅選擇，但預留75萬元讀書多咗少少，70萬都好夠㗎喇！咁如果係70萬嘅話，就有30萬投資喇！除咗買股票，30萬可以置業，買個上車盤，又可以畀到10%首期！當然你唔好諗住市中心，或住豪宅啦！」

CY 科技大學工管系三年級學生

開模型館收入場費

「如果我有100萬，我就會去唔同嘅地方旅行，收集唔同地方嘅英雄概念產品，例如日本嘅鹹蛋超人模型呀、美國嘅蜘蛛俠poster等。如果夠錢嘅話，應該會搵埋太空人同埋機械人1:1嘅模型。之後我就會租一個地方開展覽，咁就可以收番啲入場費啦！可以做到自己想做嘅嘢，又可以賺到錢，都唔錯呀！」

蘇偉文評：恐慘淡經營

「呢位同學喺咪屋企唔使開飯先？從佢個計劃嚟睇，佢只係為興趣而唔係為生活！雖然可以開展覽收入場費，不過，外國就有好多例子都說明咗開展覽多數都係慘淡經營，咁當然如果你好有品味，吸引到好多人入場就另計啦！」

「另外，喺香港搞exhibition（展覽）嘅競爭都幾大，除非你自己已經有好大嘅競爭力，譬如佢話搵啲鹹蛋超人模型番嚟，咁就要比日本嗰啲更吸引先得囉！」