太子手記：中國經濟睇得唔打得
大家經常聽到西方對中國嘅美稱係「東方巨龍」，又或者話中國係「亞洲經濟火車頭」嘅形容，但講到形容中國經濟嘅現況，又點及得上人民銀行貨幣政策委員會委員李稻葵話「中國經濟似十六歲嘅姚明，好似準備好，實際容易受傷」咁傳神呀。
似少年姚明易受傷
呢幾日李稻葵不停接受訪問，同大家講吓美國第二輪量化寬鬆措施，又講吓樓價，講到依家嘅經濟情況時，李稻葵話：「我哋確實未準備好，就好似十六歲嘅姚明。身高可能一米九、兩米，表面上係好好嘅籃球員，實際上未準備好，容易受傷。身體協調性唔得，肌肉唔夠發達，自我保護意識不足。」呢個至係我哋家吓嘅情況。
李稻葵嘅口才真係幾好，講到樓市，佢就一語中的，直指導致內地樓市成為「怪胎」嘅其中一個原因，係因為大家仲有封建嘅土地文化傳統。大家都想有樓，搞到樓價奇高，都係「奇怪嘅需求」所致嘅。佢話中國係「被金融危機」嘞。