期指攻略：結算前無謂勉強落注
外圍氣氛改善，可惜港股表現依然不濟，尋日恒指升30點，收報23,054點，同午市高位相比回咗229點之多，成交縮到744億元，是近兩個月最低紀錄。有趣的是，港股似乎處於「獨弱」情況，隔晚美股因為消費信心指數勝預期，回升150點。同樣的宏觀因素，對滬綜指的影響似乎細得多。中港兩地股市表現形成巨大落差，明顯可見基金入市興趣唔大。
仲有兩個交易日結算，會唔會有奇迹打救好友？筆者唔排除超賣下有死貓彈的可能，但即月期指目標可能止於23,300點，最叻係23,450點，期指一日唔升穿23,850點，筆者唔敢輕易斷定弱勢扭轉，逆市揸好倉，也得小心控制。
一連兩日令人失望的反彈，令筆者對恒指要試22,680點大支持位的憂慮增加不少，惟A股及美股有短期完成尋底的形態，是目下博反彈矛盾之處。筆者會選擇結算前兩日，唔勉強開倉揀一邊落注。
