Fundman睇市：大快活派高息添吸引力

八月底，聯儲局主席伯南克提出會推出QE2，簡單啲講，係印更多銀紙再左手借番畀右手，聯儲局今次控制短息去到零，連長息（主要係債息）都要按低，以減低高負債的美國官民負擔，爭人錢仲咁惡唔畀息？或者世界上只有美國可以咁做，但世界無咁大隻蛤乸隨街跳，聯儲局擴大資產負債的代價，係鈔票購買力不斷貶值，只係今次變咗美國人爭人錢，全球齊齊幫佢還。九月初至今，美元兌一籃子貨幣跌咗4%，金價升10.3%，十九種商品及農作物價格編製而成的CRB指數，升咗12.6%，油價更升13.3%，鈔票變成最差嘅投資工具。

近日見大行估內地十一月通脹會進一步攀升至5%，環球資金氾濫，明年通脹目標極可能提高至4%。中港兩地負利率情況愈來愈嚴重，兩地政府不約而同又唔希望熱錢湧去樓市，筆者相信熱錢最終會流向股市，而近日的震盪，可視為提供難得的低吸機會，看官務必要好好把握。

近期炒得火熱的零售股，陸續出成績表，可惜唔少市值唔夠秤（今浪之前），較少分析員作預測，股民要自己做功課。

包浩斯捱沽有玄機

時裝連鎖店包浩斯（00483），半年賺2,303萬元，同比升34.6%，每股盈利6.4仙，中期息2仙。業績曝光後，尋日股價插超過一成，跌0.45元，報3.43元。

一般而言，由於下半年覆蓋聖誕及新年假期消費旺季，過去兩年業績，有六至八成收益在這段期間產生，以中期增長推測，全年賺1億至1.15億元，市盈率12.3倍，估值對比I.T（00999）及JOYCE（00647）有折讓，唯一要彈嘅係中期業績，增長完全依賴香港部分，分部貢獻升1.28倍，反之內地貢獻只升8.6%，不能確定這是否昨日被拋售的原因，但筆者相信明年租金支出對包浩斯經營成本壓力，會漸漸明顯。

另一隻鮮見炒作的先施錶行（00444），截至九月底止半年賺3,301萬元，每股賺8.1仙，股價狂升七成二。這零售股比包浩斯更冷門，去年虧損主要是存貨撥備影響。留意到，截至三月底的六個月查實獲利3,275萬元，換句話說，若以九月底作結，十二個月的成績表賺6,576萬元，市值7.1億元，升七成多，市盈率都係得10.8倍，難怪炒到癲。

成功改善品牌形象

最後一提係最愛的快餐股，大快活（00052）半年賺7,071萬元，同比升43%，每股盈利56.25仙，派中期息20仙外仲送特別息8仙。值得一提，以半年為單位的話，今次係大快活「沙士」之後，最賺錢的六個月業績。

大快活今次業績最亮麗之處，是毛利率由14.3%升至15%，儘管人人擔心供港食品價格上漲，對餐飲股造成衝擊，但事實證明，經過幾年時間改善品牌形象，已經收到效果，成本得以成功轉嫁食客。撇除出售資產的1,560萬元一次過收益，大快活核心利潤大約5,500萬元，分析員估全年賺1.11億元屬合理預期，市盈率12.8倍，如果提高派息是長期政策，相信估值有追貼大家樂（00034）的條件。