大凌小股東 警醒港交所
大凌集團（00211）停牌已經六年幾，但有關呢間公司嘅新聞一直都無停過，唔係監管機構對公司前職員採取法律行動，就係小股東告監管機構涉嫌失職，總之沒完沒了。尋日又多一名大凌小股東聲稱入稟高等法院，控告聯交所上市科總監（監察部）簡嘉穎疏忽及失職，導致呢位原訴人胡錦波（波哥）嚴重損失，要求賠償1,400萬元！
停牌六年 復牌無望
為咗引起廣泛注意，尋日波哥約咗傳媒朋友見面，講解吓點解有呢次行動。波哥話，佢當年睇好大凌，由4毫幾子開始買入，買到幾個仙都有溝貨，保守估計投資咗二、三百萬，結果公司停咗牌六年幾，但係公司近年已恢復盈利，仲派息、派紅股，可惜一直復牌無望。波哥曾同聯交所兼同簡小姐見面，但始終未能畀到滿意嘅答覆，所以決定入稟高院，畀交易所同簡小姐一個警醒咁話。交易所就保持一貫作風，不作任何回應。