期指攻略：淡友得勢 下試22680

特區政府落重藥驅趕樓市炒家的威力，及唔上南北韓炮彈亂飛。筆者原以為上午恒指跌400點，已經差唔多，殊不知午飯時間南北韓局勢轉趨緊張，淡友乘機踩多腳，最後恒指跌627點，收報22,896點，收市前期指高水稍為擴大，收22,951，跌624點。常言道大淡好尾市，所言非虛！

收市後，睇番美元及黃金升勢，同樣係一瞬即逝，南北韓局勢好明顯被借題發揮，不過，淡友經已得逞，現貨跌穿23,213點及23,141點兩個重要支持，10日線也跌穿50日線，整個大市技術走勢轉壞，已是不爭事實。

前日23,460開的好倉，估唔到一開市已跌穿既定的止蝕目標23,370，喊23,310，現貨開市後期貨浸浸落，傾向逢低揸倉的筆者最終要到23,200才醒覺止蝕，付出代價。

由於牛證下一個收回高峰是22,800點，大戶會否再下一城，看來只要外圍配合，機會未可抹煞，尤其尚有四個交易日結算，十月底的低位22,880守唔住的話，止蝕沽盤可順理成章再推低好友防線，看來餘下幾日攻落22,680（20,372到24,988升浪的0.5升幅回吐）的機會唔細。

鑑於港股中線走勢已轉壞，惟有暫時擱置逢低揸倉策略，如果出現技術反彈，去到23,350樓上，筆者會以四分一注碼試沽。