股海實戰：四川成渝發揮抗跌力

內地人行收緊水喉，A股頻吃「彈散」；香港方面，市場仍在消化政府打擊樓市炒風措施，冷不防昨日午後又傳來南、北韓交火，金魚缸人心惶惶，恒指昨日失守23,000點，曾低見22,871點，收報22,896點，跌627點，大市成交922億元。

眨眼間恒指經已跌至唔少人心目中嘅支持位22,800點水平，但內、外利淡消息交錯，呢個支持位嘅承接將備受考驗。阿莊認為，無論如何，若然今次只係大升市嘅調整，恒指唔應該穿22,500點，否則便要為後市作重新評估。

事實上，阿莊喺上周四講過，淡友捱咗咁耐，難得呢個月有得發圍，點會咁輕易放過班好友，加上呢個月底有超過70隻恒指牛仔到期，昨日港股沽空額增至61億元，睇見咁多利淡因素左右市況，務實啲都係無謂花心神估底，有錢喺手都唔好心急入市撈底。

昨日阿莊話美聯集團（01200）不宜抄底，果然股價持續受壓，低位曾見6.12元，收報6.16元，跌5.08%，成交2.23億元，三個交易日股價唔見25%，呢次真係「內傷」甚重，恐怕有排抖！

回說阿莊嘅持股，本月中旬買入嘅神州數碼（00861），炒住對岸發行TDR掛牌及物色收購項目，昨日股價曾高見17.06元，阿莊見到反正有錢賺，遂以平均價16.8元沽出三萬股，套現五十萬元，執番兩萬蚊壓壓驚！

另外，論組合持股，阿莊發覺呢期隻中國南車（01766）真係最硬淨，昨日收市報8.95元，跌0.89%，10日線喺8.8元。若然嚟緊市況回穩，真係想買番啲貨，會考慮再加注此股。

新政策無損盈利

股海風雨飄搖，要搵避險之選唔容易，也許內地公路股係較穩陣之選。雖然最近國務院公布十六項穩定物價措施，其中要求自下月起所有收費公路對合法裝載鮮活農產品嘅輛免收通行費。

但據了解，其實國家主要高速公路幹道早前已經執行咗「綠色通道」政策，對鮮活農產品豁免收取通行費，至於今次新加入嘅品種佔實際運輸量比率亦唔高，故料對上市公路股盈利能力影響不大。

講到公路股，昨日見四川成渝（00107）股價發揮出色的抗跌能力，收報5.41元，升0.56%，成交1,501萬元。成渝今年以來經營表現出色，首三季度純利達9.16億元，已超過去年全年盈利數字，料全年計可保持雙位數字增長，現價估值具支持。

為咗加快構建西部綜合交通樞紐，以及建設西部經濟發展高地，四川省政府今年四月組建四川省交投集團，最近行政劃撥經已完成，交投集團已成為成渝嘅控股股東。喺釐清持股布局後，日後能否為成渝高速帶來更多在西部運輸業嘅投資機會，不妨等着瞧。

戰報

TCL通訊（02618）

阿莊上周二推介TCL通訊，其股價昨日一度升至7.23元高位，較推介當日的低位6.7元，累積升近8%。

+8%

中國建築（03311）

May上周四建議短炒中國建築，當日股價低位見6.03元，昨日一度升上6.68元高位，累積升幅逾一成。

+10%