太子手記：中國動向搵老外做CEO
競爭激烈，內地各大體育用品商各出奇謀爭生意，中國動向（03818）開創先河，請咗一名女性外國人擔任CEO，佢係前adidas大中華區CEO，而現任CEO秦大中就調任副主席。
而呢一位新嘅CEO叫Sandrine,Suzanne,Eleonore, Agar Zerbib，將於下周一上任，喺九十年代，佢係adidas中國區董事總經理，有份幫手打入中國市場，○八年佢升為大中華區總裁，得意之作係adidas成為北京奧運會嘅贊助商。
秦大中調任副主席
根據合同，Zerbib嘅年薪300萬元人民幣、董事袍金每年17.6萬元人民幣。至於原來嘅CEO秦大中就調任副主席，當年佢同主席陳義紅由李寧（02331）走出嚟開創呢間公司，一齊打江山，陳總負責策劃，秦總就負責執行。
太子聽財經界朋友話，外界對新CEO反應一般，認為新CEO未必了解內地體育行業，特別係二、三線城市，不過公司引入新血，有助新思維，改善營銷政策。