元朗股神：撈底時機到
有逾二十年股票投資經驗的「元朗股神」曾錦安表示，現時大戶借不同利淡消息「質低」港股，但恒指跌至22,800點水平，已令不少牛證被強制收回，料「殺牛」行動近尾聲。再者，歐債危機、內地收緊銀根等壞消息已逐漸於市場反映，而南北韓局勢緊張僅是突發及單一事件，相信港股現已屆撈底時機。
他指出，調整過後，恒指今年底前可再上試今年近25,000點高位。他更坦言，昨日因個人事忙而未有入市，但今日會趁機買入心水股份，當中首選吸納對象為零售內需股及資源股。
散戶審慎唔敢入市
不過，普羅散戶則大多認為現未到撈底時候，散戶黃先生表示：「三、四個月前賣晒啲貨啦，嗰時個市無依家咁大起大落，都賺咗少少啦！呢排日日跌都唔撈底啦，工作太忙無時間睇住個市呀！」
散戶William認為：「尋日跌600幾點應該唔多關南北韓開火嘅事，主要係因為大戶震倉！覺得依家仲未撈得住，最好等個市跌定先，但心急嘅話亦可以分階段小注入市！嚟緊我就睇好同高科技有關嘅內需股同中資煤炭股。」
散戶點睇
仲有得跌
Phoebe：「我覺得跌600幾點都係正常調整，話晒之前都升咗咁多，個市應該再有得跌，可能去到22,000點先見底呀！」
買咗滙控
Jerry：「唉，依家想放都放唔到啦！都唔知跌到幾時！我仲上個禮拜三喺83.4元入咗幾手滙控，尋日又落返去80蚊邊！」