政府亂落藥後果嚴重

上個禮拜，天氣時冷時熱，Paul少一個唔覺意都「中咗招」，個頭赤赤痛兼且流鼻水。不過，成個禮拜做嘢做到冇時停，加埋老編又頻頻打電話嚟催交稿，搞到醫生都唔得閒去睇，於是「啪」兩粒傷風丸頂住，諗住過多兩日就冇事，但連續食咗兩日都完全冇乜改善，於是膽粗粗，一次過食足四粒、六粒咁，點知愈食覺得愈唔妥，結果……Paul少最終都要連夜去幫襯醫生。

醫生仲好語重心長咁同Paul少講：「唔好將啲傷風丸當係糖咁食，藥呢樣嘢，唔係食得多就會好得快，最重要都係睇你身體對抗病菌嘅能力……食藥食過量，後果隨時仲嚴重過大病一場。」

打沉正常投資活動

政府急急推出重招遏抑樓市，其實同Paul少「搏命」啪傷風藥一樣咁危險，因為政府用短期交易重稅去大力打擊樓市，唔單止打壓班炒家，其實好可能連正常嘅樓市投資活動都打沉埋，最終令整個樓市嘅生態都改變埋。

雖然政府會大條道理話，今次出手，係志在打擊短炒嘅勢頭，同時亦都防範美國次輪量化寬鬆措施（QE2）熱錢大量流入，令樓市「火上加油」；對於有心買物業作長線投資嘅人，例如啲收租客，或者半自住半投資嘅置業者，根本唔會有太大影響。但其實，嗰種漸進式嘅心理同埋實際影響，一啲都唔細。

投資者冇轉身機會

須知道，凡係投資都存在風險，而且投資組合亦需要不時有變化，所以每項投資都要有一個「逃生門」，令投資者有需要時可以快速改變策略，或者係適時套現嘅出路。呢個逃生門唔單止炒家要有，就算係長線收租客都要有。

正如有人買滙控（00005）係為咗收息，但係亦都唔排除佢哋見好價沽貨。但係，依家政府抽重稅嚟打擊短炒，同時亦都令到正常嘅物業投資者冇咗「轉身」嘅機會，投資者一旦買咗個單位返嚟收租，就算市況唔係咁好，或者發現有更好嘅投資機會，都「焗住」要守一排，否則就先「罰」一大筆。

樓市變質影響深遠

當樓市變得咁缺乏彈性嘅時候，莫講話炒家，就算係一般嘅投資者，都會敬而遠之，咁即係變相謝絕一切投資者，真正變成「用家天下」，但係，如果當物業嘅投資價值大減嘅時候，樓價究竟應該企喺邊個水平先至係合理呢？當樓市出現呢種「質變」，所帶嚟嘅負面影響，究竟又係唔係班負責「度橋」嘅高官所能夠預見呢？