金貿場經紀牌千金難求
全球資金氾濫，金價冇辦法唔升，揸住個牌做金業生意嘅，就更加發到豬頭咁，尋日金銀業貿易場一百周年酒會上，太子見到好多金商蓮子蓉咁嘅樣，就知佢哋有幾好景。
詹劍崙：冇諗過賣
黃金價格早前係咁急升，金銀業貿易場個牌價亦自然水漲船高。依家個貿易場牌照已升到去500萬元，不過，雖然個牌價急升咁多，但都冇人願意沽出喎。詹培忠個仔詹劍崙同太子講，直情冇諗過賣喎。證明佢好睇好後市，有大把錢途啦！
事實上，黃金業真係好似好好景喎。本身有經營黃金業務嘅證券學會會長李細燕就話，黃金價格依家急升，內地客投資黃金興趣濃厚，佢間公司就喺內地出現九個虛假網站。