市場徐想：質素行先揀內銀股
恒指由高位回落差唔多有成1,800點後，尋日又彈番400幾點，大家講嘅技術分析，例如：「死亡交叉」、10日穿20日線似乎又唔太靈驗，無他嘅，平均線係可以做出嚟，大家唔好盡信。參考就梗係可以，其中恒指重要嘅支持位22,524點係一定唔可以破，一日唔破，都不宜輕易做淡。
回調市，唔等於休息，應該向有質素而又有能力推動下一個大浪嘅股票做功課。內銀股就梗係首選啦！好似建行（00939）由高位回到近7元，已經有一個好明顯嘅回調，尋日上番7.3元收，可以留意7.1元附近係第一個試入機會。
同一時間，半新股喺呢輪急跌之後，大家又要重新向佢吔嘅基本因素進發，因為大戶為求鎖定利潤，毫不留力咁起勢沽貨，但睇吓四環（00460）同長興（00238），畀人沽到咁上下，尋日就見撩番上去。呢兩隻股，有概念、有賣點，愈近招股價入市風險就愈低，不妨多加留意。