股海實戰：粵海投資啱打守勢波

內地A股昨日終於回穩，並帶動港股止跌回升，恒指反彈422點，收報23,637點，但兩地股市成交均明顯縮減，港股昨日成交額不到1,000億元。目前尚難評估跌浪是否經已告一段落，大家都在等阿爺出牌，再謀定而後動！

新股中信大錳（01091）昨日首天掛牌，前日聽到暗盤交易曾跌穿招股價，已叫人有大跌眼鏡之感，昨日開市後曾低見2.69元，幸好遇上大市反彈，尾市股價回勇，高位見3.03元，收報2.92元，較招股價2.75元高出6%。正所謂「一個銀仔有兩面」，悲觀睇股價表現受累大市氣氛轉淡，令捧場客大失所望，樂觀睇撞啱跌市先至有機會畀大家喺掛牌首日入場執平貨！另一隻同獲基金入重飛嘅熔盛重工（01101）今日首天掛牌，就睇吓可唔可以企穩喺水面！

昨日莎莎（00178）公布業績標青，股價飆升，並帶動整個零售股板塊上升，卓悅（00653）股價升8.2%，漢登（00448）升13%。而JOYCE（00647）、I.T.（00999）及利信達（00738）同升一成。金飾股炒作亦沒完沒了，六福集團（00590）及景福集團（00280）同升逾9%，相比之下周生生（00116）僅升5.8%，可視為炒落後對象。

事實上，仍停留喺股市內嘅資金，斷唔能夠日日企喺度唔做嘢，故見到資金在不同板塊（特別係有國策牌力挺者）之間游走，昨日煲起本地零售股，汽車股反彈力度亦唔錯，相信家電股及醫藥股亦遲早翻炒，其中家電股可睇實海信科龍（00921）及國美（00493）。

若然怕風浪大唔想冒險，繼續聚焦防守性股份，除咗昨日提及嘅中銀香港（02388）之外，粵海投資（00270）亦係唔錯嘅選擇。

供水業務收入穩定

粵投逾半收益來自供水業務，由於粵港雙方有簽訂供水協議，故公司大部分收益變相已有保證，提供穩定收入來源，至於兼營的物業投資與發展，以及收費道路及橋樑業務，對整體業績構成波動性影響有限。

今年上半年，粵投實現純利11.24億元，如無意外，全年計純利可保持約一成的增長，派息比率亦十分穩定。老實講，以粵投每年約一成的利潤增長，歷史市盈率約十一至十二倍，息率2.7厘左右，喺大升市中咁嘅估值未必有吸引力，但遇着跌市，投資唔求大升，只求與大市同步甚至保本，咁粵投都可以話係合適嘅選擇。

過去一年多，粵投股價向上一直受制於4.3至4.5元區域，今年第三季以來其股價跟隨大市上升，但本月上旬升抵4.38元後便告掉頭，昨日低位3.9元，相信喺缺乏重大消息刺激下，股價會維持喺3.5至4.5元橫行區上落，落番3.8至3.9元，想「避風」者值得諗諗佢。

戰報

六福集團（00590）

阿May前日推介的六福，尋日跟隨零售股大幅反彈，最高升到24.3元，比推介當日低位21.8元，足足升咗11.4%。

中國無線（02369）

志強尋日介紹中國無線，同樣跟隨大市回升，股價最高見過4.8元，以即市低位4.38元計，單日最多可賺9.5%。