莎莎郭少明約定單車鐵女
莎莎（00178）上半年業績亮麗，股價又狂升，主席郭少明當然風騷，太子同佢傾開公司嘅代言人，原來早前有「女版黃金寶」之稱黃蘊瑤（Jamie），喺亞運會單車項目中，負傷贏銀牌，佢曾經出席莎莎活動，同郭少明有一面之緣，郭少明話戥佢高興之餘亦好感動，Jamie有香港人打不死精神，返到香港要請佢食飯祝賀吓。
與黃蘊瑤早有淵源
郭少明話，早前為咗將公司形象年輕化，就已請咗二十多歲嘅Jamie做「活力之星」，當時Jamie話自己好喜歡扮靚，成日要用護膚品護膚，所以莎莎搵佢做活力之星佢就一口答應。
郭少明又話，對於Jamie攞到銀牌當然高興，當日佢喺單車場炒車，被單車輾過，估唔到佢可以堅持作戰，仍忍痛比賽之餘，仲可以奪得銀牌，佢有不放棄同堅毅精神，好值得大家學習，又話要多些表揚運動員，佢哋真係好有毅力，問到郭少明會唔會送公司嘅護膚品畀佢，佢笑言會同阿Jamie食飯先再講。
