股神善有善報白宮授勳
股神巴菲特投資成績勁，做慈善又瞓晒身，白宮就啱啱宣布咗將會頒本年度美國最高榮譽嘅總統自由勳章畀佢，表揚佢樂善好施嘅精神同埋傑出嘅成就。同股神一齊攞到呢個獎嘅有14人，包括美國前總統老布殊，表揚佢長期服務國家；德國第一位女總理默克爾，表揚佢喺政經界嘅成就；同埋世界知名嘅華裔大提琴家馬友友等。頒獎典禮明年初喺白宮舉行，並由奧巴馬親自頒獎。
白宮讚揚股神係美國人嘅投資家、工業家同慈善家，簡直係美國人嘅傳奇。仲話股神早幾年同埋微軟蓋茨一齊搞咗個叫做「捐款誓言」嘅慈善活動，承諾死後捐出九成九嘅身家，佢仲鼓勵埋其他美國富豪捐一半身家出來，呢份善心真係唔係個個有錢人都做得到㗎，所以話股神真係實至名歸。
感謝奧巴馬 互笠高帽
股神一知道自己獲得咁高嘅榮譽後，就「禮尚往來」即刻喺《紐約時報》登咗篇感謝信畀奧巴馬，除咗感謝頒呢個獎畀佢之外，仲稱讚奧巴馬喺金融海嘯時表現出色，成功帶領美國人走出困境咁話喎！呢頂高帽仲笠埋畀伯南克、蓋特納同埋小布殊，話如果唔係佢哋夠果斷，依家美國可能輸剩南瓜同埋老鼠。