股海實戰：中銀香港可作避風港

淡友好耐冇發圍，一發圍就唔得了，恒指已由本月高位回落1,796點，累計跌幅7.1%，已跌至接近50日線（23,038點）水平，若然呢轉失守22,800點，後市或要繼續向下尋找支持位。

翻查發行商資料，本月底前有超過70隻恒指牛仔到期，睇嚟十一月份期指結算，將無法延續「金九銀十」嘅強勢，至於跌到落咩位先至可以再買貨，就仲要觀察內地政策去向才能下定論。

內地A股持續向下，但好在交投未有大增，大戶們都在耐心等候入市機會。理論上，滬綜指落到2,700點水平會有一定承接，畢竟資產價格不離股、樓二市，內房樓價已被點穴，若然股市急劇波動，或會動搖經濟復甦基礎。

今年內地商品、食品物價上升，人為炒作乃關鍵因素，中央出手整頓只係遲早問題。近期阿莊唔少喺內地開廠嘅老友，都話製造原料價格不斷上漲，生意愈來愈難做，加上人民幣升值因素，再係咁落去，真係等住關門大吉咁話。

做廠嘅如是，打工嘅亦慘，房租、食品價格等生活支出持續上升，加上加息周期開始，居民消費信心唔多唔少亦受到影響。最新調查數據就顯示，今年第三季度中國消費者信心指數為104點，較次季下降5點，乃連續上升五個季度後首次出現回落，可見阿莊呢份擔憂絕非杞人憂天。相信喺決定加息步伐以及推出遏抑通脹措施前，中央政府必須要審慎衡量對內部需求同經濟復甦基礎嘅影響，免得用力過猛，令到呢兩年嘅努力白費。

太陽能板塊跌得勁

個股方面，估計由於部分游資要沽貨班「水」北上，個別早前獲表叔熱炒嘅板塊跌勢頗急，就如太陽能板塊，昨見鉑陽太陽能（00566）跌5.6%、卡姆丹克（00712）跌7%、興業太陽能（00750）及陽光能源（00757）同跌逾4%。阿莊見手持嘅保利協鑫（03800）勢色唔對，中午前跌穿2.4元，便急忙跳車，最終以平均價2.38元沽出30萬股，得個「吉」好冇癮，但見下晝插到落2.23元，亦慶幸執番身彩！

呢期股市下跌由商品跌市觸發，睇嚟即使暫時喘穩，亦冇咁快復原，故擬睇位沽出福山能源（00639）止蝕。

股海風大雨大，尚未抽離股市嘅資金，正在四出找尋防守性股份，以暫避風頭。昨見中銀香港（02388）股價逆市向上，高位曾見27.85元，收報27元，升1.5%，成交9億元。

最近摩通發表報告，除咗將港股明年目標定喺28,000點外，建議首選持股亦包括中銀香港，主要睇好其業務受惠人民幣國際化發展。唔經唔覺，原來中銀股價已由本月高位回落逾一成，相信25元水平具支持，可以視作避風港。

戰報

中油沽輪（23985）

魚缸風聲鶴唳，藺俠尋日推介嘅中石油（00857）沽輪23985，以全日高位0.145元報收，較低位0.133元，升9%。

+9.0%

中能控股（00228）

個市兩日跌咗800點，不過志強尋日推介嘅中能，表現卻相當硬淨，即市見過0.47元高位，較低位0.445元，升5.6％。

+5.6%