友邦老臣回巢擔大旗
上市唔夠一個月嘅友邦保險（01299）有新官上任，宣布委任韋國敦（Gordon Watson）為區域董事總經理，大家可能對Gordon有啲印象，因為佢之前喺美國國際集團（AIG）及友邦工作咗超過二十五年，仲曾經擔任AIA嘅助理總裁。
明年上任駐紮香港
咁今次Gordon回巢所管嘅「區域」又係邊一區呢？友邦就神神秘秘咁話未係時候公布，只係透露Gordon之前喺友邦嘅阿媽─AIG嘅「另一個仔」ALICO度工作，擔任全球副主席及日本業務區域首席執行官。太子又八到，Gordon之前曾經喺香港工作，明年一月一日上任後，佢嘅辦公室亦會駐紮香港。
雖然太子估唔到Gordon主管範圍，但AIA首席執行官杜嘉祺就好賞識Gordon，大讚佢對區內業務運作有深切認識，能提升及拓展AIA業務。