太子手記：澳洲舖租「升值」超港

美元貶值相信係長線走勢，近日兌主要貨幣上升，只係趁歐債危機「死貓彈」，美元唔值錢，港人深受其害，就連全球最貴商舖租金排名，都要執過位。澳元大升，令澳洲嘅悉尼霸咗香港嘅第二位，香港就被迫跌落第三位。

悉尼進佔全球次貴租

咁多年來，美國嘅紐約，同埋香港嘅一線購物區商舖租金，都穩守全球每呎最貴嘅第一及第二位。但世界變咗，世邦魏理仕一份零售商舖租金報告就話，今年第三季，港人熟識嘅澳洲悉尼一線購物區每方呎舖租錄得約792元（港元．下同），比香港每方呎舖租約723元，高出超過9%，舖租排名成功升至全球第二位，即係霸咗香港個位，而香港就「鄧」咗落第三位，英國嘅倫敦就排第四。

唔通佢哋因為經濟好轉，啲業主猛咁加租？地產界老友話，國際性報告都會以美金計算物業價值，過去半年澳洲紙匯水係咁升，折番美元就等同租金升咗，而港元就同美金掛鈎，一泊埋就輸蝕咗。

所以，除咗悉尼之外，澳洲嘅墨爾本亦由第12位，躍升至第10位，連同維持第9位嘅布里斯班，澳洲總共有3個城市舖租都躋身十大最貴行列，為眾國家中最多城市入選。至於紐約舖租仍高達每方呎1,170元，遠遠拋離悉尼同埋香港。