近日特區政府高官高調評論樓市過熱，加上憂慮內地加息，港股持續整固，不排除十一月期指結算按月只會原地踏步，等下月聖誕假前才有力再試高位等過新年，想買貨者，可多睇幾日，別急於撈貨。
公司呢一刻冇需要配股集資，唔等於以後都沒有配股集資需要，呢個道理好易明白。若然大市再度走高，上市公司趁旺市配股集資以備存發展資金，實在係無可厚非。繼美林、瑞信發表報告睇好地產股後，近日大好友瑞銀亦開腔，預期喺二○一二年底前，本港住宅樓價將有四成升幅。
由此可見，投行基於息率持續低企，以及本地樓市供需角度出發，依然睇好本地樓市前景。新地既屬龍頭地產股，乃首選股份，公司即將派發末期息每股1.85元，將於十一月廿三日除淨，此前股價守135元水平，可留意低吸機會，博財息兼收。
除咗本地地產股外，投行高盛近日發表報告，指參考美國零售業嘅發展，內地零售股只係剛剛開展長征之路，故上調內地零售股目標價，其中百麗國際（01880）被納入「確信買入」名單，目標價調高至18元，可想而知老外繼續睇好內需股嘅表現。
土炮手機更佔優勢
講到內需，電子產品消費市場嘅增長潛力亦十分可觀。中移（00941）高層最近表示，目前農村手機普及率仍有龐大嘅發展空間。講到開拓農村市場，「土炮」手機比海外品牌更有優勢，令阿莊想起TCL通訊（02618）。
TCL通訊今年首三季度營業額56億元，按年增長1.34倍；純利4.51億元，單是第三季純利2.02億元，增長13.43倍。今年首三季度，公司銷售手機2,370萬部，增長1.55倍，整體毛利率由去年同期嘅18%增至22%。
業績報告預計，到咗今年底，喺內地智能手機市場嘅滲透率將達14%。由此可見，隨着中高端產品佔收入比重持續增加，其整體毛利率尚有提升空間。
幾可肯定，今年TCL通訊的業績將出現大躍進，而增長勢頭將於明年延續。該股現價7.08元，假設第四季盈利可保持第三季嘅水平，今、明兩年預測市盈率分別只有12.8倍及11倍左右，估值仍然吸引，上車有心唔怕遲！
戰報
中國天化工（00362）
冼金基尋日建議趁低吸納中國天化工，昨日逆市呈強，股價高見0.28元，以低位0.255元計，單日升9.8%。
北京御生堂（01141）
錢進尋日推介的北京御生堂，逆市做好，高見0.395元，較低位0.36元單日升9.7%。
