樓市後向還看加薪

今個禮拜，打工仔人工成為熱門話題，除咗「扣飯鐘錢」問題得到解決之外，最低工資亦都正式出台。可能大家會話，呢啲issue比較影響低下階層嘅市民，同買樓置業一族似乎談唔上有咩關係喎，Paul少點解會講講吓樓市，又會轉咗tone講民生呢？

通脹肆虐 人工唔夠冚

其實，最低工資同樓市，或者同置業一族當然冇乜直接關係。但係每逢到咗年尾，加薪問題好自然就成為打工仔最concern嘅事，尤其係打算上車嘅買家，都要計清計楚自己嘅供款能力，而換樓客亦都會為此去考慮得好周詳，睇吓自己嚟緊一年，仲可以有幾多「鬆動錢」使，先至再考慮會唔會換大啲嚟住。

Paul少認為，雖然依家中價樓至高價豪宅嘅升勢，往往都係取決於資產升值嘅速度，即係啲人究竟可唔可以喺股市同埋樓市度賺到錢，然後再upgrade自己嘅生活水平。但係喺中小型住宅為主嘅mass market裏面，透過投資賺錢嚟搵錢買樓，始終唔係主流，所以講到尾，個市好睇本地用家嘅負擔能力，呢樣嘢亦都同佢哋嘅加薪幅度好有關係。

或者大家又會話，依家樓價升得咁快，打工仔嘅加薪幅度，根本就冇可能追到。老實講，呢個問題你知我知，大家都知。以依家嘅通脹情況嚟講，打工仔除非喺年尾加三、四成人工，否則根本好難追得上樓價升幅；加上依家通脹咁厲害，日常生活開支都多咗唔少，加薪夠唔夠冚都仲係未知之數。不過，買樓呢個行為，除咗建基於買家嘅實際能力之外，亦都好睇心理因素，今年有冇得加人工，或者可以加到幾多，好影響班用家嘅態度同埋信心。

如果老闆喺「賺到笑」嘅同時，卻又對員工「側側膊」，唔肯同佢哋分享成果，咁唔單止對員工嘅工作士氣構成打擊，對於買樓嘅意欲亦都大打折扣。因為當打工仔撫心自問，覺得今年加薪都算合理嘅話，佢哋好自然會認為，就算今日「勒緊褲頭」去買樓供樓，明年嘅生活水準仍然有望改善；但如果喺呢兩年嘅好景底下，仍然見唔到啲老闆「識做」嘅話，咁就更加唔敢喺依家嘅高樓價情況下入市，有錢剩都寧願以備不時之需。

心理爆發力 要睇明年

Paul少估計，今年大部分有能力置業嘅打工仔，佢哋加薪幅度應該都可以達到大家都開心嘅水平。至於加薪之後，對中小型樓嘅「心理爆發力」究竟有幾大，相信去到十二月至明年一月期間就會顯現出嚟。如果屆時適逢投資者同埋班有唔少「餘力」嘅中產，喺股市度「割禾青」，將錢轉入樓市，兩股推動力加埋，樓市絕對會有另一番榮景。