股海實戰：神州數碼好消息不絕

內地股市持續調整，滬綜指昨日曾跌穿3,100點關，收報3,115點，跌19點，市場在預先消化十月份CPI數據，以及人行即將調高銀行存款準備金率等消息。港股亦同樣走低，午後試圖反彈未果，恒指收報24,500點，跌209點。

呢頭美國聯儲局宣布採取第二輪量化寬鬆政策，嗰頭IMF就話聯儲局很可能還有第三輪量化寬鬆政策，究竟嚟緊美元貶值潮有幾嚴重，資產泡沫對全球經濟構成嘅威脅如何化解，當真令人懊惱。為此，嚟緊G20峰會矛頭直指美國，但正所謂「人窮志短」，面對新興市場嘅指罵，美國政府厚住面皮任你鬧，鬧完就由你埋單。

各新興市場如今正埋首作出應對，防範熱錢湧入攪亂檔攤。對此，人行行長近日拋出用「池子」圈「熱錢」之論，大家都關心「池子」所指為何？一個肯定嘅答案，乃內房市場並非熱錢「蓄水池」，反而嚟緊中央政府將高度關注資產價格，並繼續緊盯內房市場情況，必要時可能會再出手打壓炒風，故見近日內房股反彈到咁上下又再掉頭回落，皆因政策陰霾依然揮之不去。

至於股市，據官方傳媒解畫，同樣唔會係「水池」所在地。要堵住熱錢湧入所帶來嘅衝擊，一般估計人行會從調控市場流通量着手，即收緊銀根，加強市場回籠貨幣嘅力度，執筆時，傳來人行已正式調升銀行存款準備金率50點子，正係其中一個有效方法。近日內銀股明顯轉弱，昨日八家內銀股全線低收，亦反映咗呢份預期。

信義玻璃大行唱好

上月下旬阿莊沽出獲利嘅信義玻璃（00868）獲摩通唱好，目標價由6.8元調高至8.8元，阿莊已講過可睇位翻兜，昨日見有大行唱好，遂乘跌市之便入場買番15萬股，平均價5.9元。

同樣係基金愛股嘅神州數碼（00861），截至九月底止中期純利5.37億元，同比增長30%。期內，軟件及服務業務佔總體營業額比重提高至56%，業務結構實現突破性改善，次季度服務業務整體毛利率提升至16.48%，為拉動整體盈利增長注入新動力，亦反映近年公司積極實施嘅轉型策略收效。

展望未來，內地加快推動城鄉化，將為神數嘅「數位城市」戰略帶來更大嘅發展空間，而阿莊亦不只一次講過，人民幣升值對神數有利，但此因素尚未充分反映喺股價上。

中期業績公布嘅同時，神數宣布建議發行台灣存託憑證，並於當地證交所上市，相信正係出於台灣市場可較合理反映資訊科技股嘅價值，另外，亦不排除明年公司將尋求分拆成熟業務喺A股市場獨立上市。展望好消息不絕，加上估值便宜，價值型投資者入貨何須猶豫？

戰報

創益太陽能（02468）

冼金基上周三指創益打底完成，當日低位5.02元，昨日股價逆市做好，並一度升上5.58元高位，累積升幅達11%。

+11%

JOYCE（00647）

錢進昨日推介的JOYCE，逆市創0.51元一年新高，以低位0.435元計，單日升幅達17%。

+17%