Google豪加薪留人才
作為「打工仔」，每年最關心嘅事莫過於加幾多人工，如果你係Google員工就有福啦，因為《華爾街日報》引述知情人士話，面對業界激烈嘅人才競爭，Google決定由明年一月開始調高全體2.3萬名員工薪酬多達10%，加幅真係令一眾打工仔既妒忌又羨慕。
明益員工早有前科
Google行政總裁施密特喺員工電郵話，今次加人工目的係想保留Google嘅優秀人才，同埋繼續吸引四方八面出眾嘅人才加入公司。公司仲希望可藉此提升員工士氣，令全體員工都覺得付出嘅努力獲得回報。Google出招保留人才「早有前科」，公司舊年曾經將派畀員工、價值大幅蒸發嘅認股權證重新定價，等佢哋唔使變廢紙，真係「明益」員工。
事實上，科技業競爭正日益加劇，求才若渴嘅科技企業都不惜工本去「搶人」，例如目前全球最受歡迎社交網站Facebook旗下近一成員工係由Google「跳槽」過去嘅；其他科企亦頻頻向Google員工高價挖角，所以Google加人工保留人才不無道理。
Google行政總裁施密特希望加人工能提高士氣。【資料圖片】
