賣樓新噱頭sell養生
好多人都知賣樓要賣得貴，除咗要地點好之外，最重要喺識得搞噱頭及包裝。太子傳媒老友最近去過中國奧園（03883）嘅南沙奧園，呢個盤唔係Sell豪華，而係Sell養生保健，仲豪擲1.8億元人民幣，喺樓盤項目內搞咗個養生城連酒店，請咗番禺前市委書記梁國維做推介。
中國人發達識錫身
養生城總策劃梁國維話，中國人富起來，條命矜貴咗，醫療、保健養生大有市場，可以為樓盤做出個溢價。養生城內更請嚟中醫師為記者把脈睇症。傳媒老友梗係冇蝕底，即刻問吓醫師，因為晚晚好夜先收工，搞到皮膚好差，同埋精神唔係咁好。中醫師就話如果睡眠不足，最簡單及經濟嘅治療方法，係於每日午時即上午十一時至下午一時期間，用三至五分鐘時間按手心勞宮穴以紓緩不適感，勞宮穴就係輕握拳頭時，中指尖所點嘅位置。
奧園樓盤推介活動上，中醫師教記者按穴紓緩不適。