股海實戰：中國玻璃 潛力未反映

上周美國聯儲局公布QE2嘅消息喺市場預期之內，但冷不防喺正式公布前後一兩天股市先嚟發瘋式上漲，恒指上周共升1,780點，升幅7.7%，上周五大市成交增加至1,344億元。總之通街都係錢，到處搵貨買。呢一刻若然閣下心生「畏高」之感，實屬正常，但阿莊深信，如此升市一生人唔多見，齋睇唔參與對唔住自己，總之投資幾時都係要量力而為。

身處咁嘅大旺市，上市公司把握機會抽水係無可厚非。恒隆地產（00101）透過高盛集資最多101億元，資料顯示其對上一次配股集資係喺○六年十一月，有咩啟示就由大家自行揣測。

除了大企業配股之外，尚有大批新股趕搭尾班車，熔盛重工（01101）及中信大錳（01091）同於今日開始招股，前者集資額介乎127億至176億元，而後者集資額則介乎15億至20億元，呢兩隻新股可謂揀啱時間招股。

所以話，第四季嘅升市，除咗睇好嘅股民欣喜若狂之外，投行亦屬受惠者，皆因今年首三季企業融資活動唔係太多，到第四季先至做到唔停手，拉勻總算可以過肥年！

時近年尾股市暢旺，資產升值效益將反映喺消費市道上，相信今年消費者辦年貨食團年飯都疏爽啲。難怪零售股升完可以再升，上周五，六福（00590）股價升4.6%，收報21.5元，已跑贏周生生（00116）（上周五收報20.7元）。睇落謝瑞麟（00417）仍相對落後，可以多望兩眼。

上周五阿莊話會睇位沽貨獲利嘅中國南車（01766），上周五按平均價每股9.7元沽出20萬股，套現約194萬元，獲利75.6萬元，尚餘8萬股，睇睇可唔可以喺10元樓上沽出。另一方面，考慮到通脹壓力上升，資源價格勢必看漲，倉底唔可以一隻資源股都冇，所以同日按平均價每股5.88元買入上周五推介嘅福山能源（00639）15萬股。

信義玻璃睇位翻兜

講開又講，早前阿莊沽出嘅信義玻璃（00868），上周五收報5.99元，跌0.12元，尚處調整當中，但其實此股受惠於內地汽車業蓬勃發展，加上與外資同業合作消息正面，不妨留意翻兜機會。

同樣從事製造玻璃產品嘅中國玻璃（03300），上周宣布配售最多8,300萬股新股，每股作價4.5元，集資約3.6億元。上月公司宣布增持從事製銷浮法玻璃嘅JV Investments權益至全資擁有，是次配股亦係因應支付交易之現金代價及維持公眾持股量而作出安排。由於交易消息正面，加上行業前景向好，配股消息未有影響股價，上周五收報5.2元，升1.96%。畢竟現價估值尚未反映盈利增長潛力（今年上半年賺2.64億元人民幣，去年全年純利1.54億元），若新股出街前後股價有波動，反可留意吸納機會。

戰報

中國南車（01766）

上周一Sammi指南車走勢轉強，股價上周持續做好，創9.78元新高，以推介當日低位8.02元計，一周累升近22%。

優源控股（02268）

錢進上周五推介的優源控股，股價當日一度高見4.45元，以低位4.01元計，單日升幅超過一成，可謂快靚正。