股海實戰：中信泰富身價水漲船高

美國中期選舉消息符合市場預期，加上高盛發表報告唱好港股，恒指勢如破竹，衝穿24,000點關，雖然下晝本港賣地成交價未如理想，但見地產股表現堅挺，恒指最高見24,163點，收報24,144點，升473點，大市成交達1,056億元。

高盛發報告將港股未來十二個月目標調高至29,000點，事關預期喺QE2公布後，大量熱錢流入新興市場，港股將成受益者。阿莊睇見前日大市未有太大回吐壓力，昨日升勢又如此強勁，終於按捺不住，入場以平均價178.5元追入港交所（00388）5,000股。

昨日晏晝特區政府拍賣延文禮士道地皮，大家都視之為發展商對政府最新住屋政策睇法嘅探熱針，結果該地皮獲華懋投得，成交價21.7億元，為市場預期下限，本來大可以視為壞消息，誰知地產股走勢強勁，對此阿莊亦感意外。但老實講，計及限制發水因素，呢個成交價都算係唔錯，唔見得地產商對後市睇法轉淡。

講開地產股，昨日最威水嘅係新地（00016），一口氣升9元，收報144.5元，升6.6%；信置（00083）升逾3%，長實（00001）、新世界發展（00017）及恒地（00012）同升逾2%。阿莊認為，睇好地產股可考慮追入恒地，目標睇63元，止蝕位55元。

身處呢啲大升市，資金向指數成分股傾斜係理所當然，所以阿莊亦增持倉位，並坐住滙控（00005）同港交所，希望可以喺大升市分一杯羹。

另一隻同樣可以實嘅重磅股，就係中信泰富（00267）。目前，中信泰富主要收入來自特鋼，其餘來自大昌行（01828）、房地產、中信1616（01883）、鐵礦開採、隧道及能源業務等等。QE2繼續印銀紙讓貨幣貶值，美元匯價勢必再散。近期澳元強勢，已足以反映呢份預期，除咗匯市同新興市場股市外，相信熱錢亦會喺商品市場興風作浪。

受惠澳元資產升值

喺澳洲投資磁鐵礦嘅中信泰富，受惠澳元強勢以及鐵礦石價格看升，資產水漲船高。此外，最近公司高層表示，長遠嚟睇，同系公司內房業務需要進行整合，故資產重組概念可為其股價帶來另一炒作誘因。

股價走勢方面，查實上月中旬其股價升得頗急，之後喺21元水平整固過後，本周再展升勢，昨日收市報22.65元，升2.95%，成交4.17億元。因外匯累計期權引發嘅風波已成過去，如今喺母公司嘅全力支持下，發展前景更勝從前，最難得係即使近幾個月股價炒落後急起直追，但現價一一年預測市盈率十二至十三倍，估值唔係貴，料年底前可試破去年八月高位24.25元，明年目標價上調至28元，支持位喺20至21元水平。

戰報

儀征化纖（01033）

阿MAY上月二十七日推介儀征時，低位只為2.79元，昨日隨大市做好，並創3.32元一年高位，累積升幅達18.9%。

+18.9%

中航科工（02357）

阿莊於十月十九日指中航科工將迎接大升浪，股價昨日一度升上4.6元，較推介當日低位3.97元，升15.8%。

+15.8%