夏佳理帶團參觀港交所
尋日有隻新的交易所買賣基金，價值黃金ETF（03081）掛牌，太子都去湊吓熱鬧，睇睇吓突然見到港交所（00388）主席夏佳理帶住一大班老外喺度，跟住呢班為數差唔多二十人嘅團隊仲行咗幾個圈，傾咗陣偈添，太子打探到，原來佢哋係來自俄羅斯海參崴嘅代表團。
邀海參崴官商訪港
海參太子就食得多，海參崴就淨係細個讀歷史時聽過個名，對呢個地方冇乜認識。不過以中俄咁友好嘅關係，一定大把世界，夏佳理話，六月嗰陣港府官員訪問過當地，邀請咗佢哋嚟香港訪問，所以今次佢哋都有一大班政府官員同埋商界代表嚟香港，交易所當然亦要好好把握機會介紹吓自己。
相信大家都會知道，依家已經有俄鋁（00486）喺香港掛牌，不過就仲未有俄羅斯註冊嘅企業掛牌，夏佳理都話希望將來有更多嘅俄羅斯企業會考慮來香港掛牌，到時港交所就真係愈來愈國際化喇。
