太子手記：升岡劉錫康潮爆寶麗萊
升岡國際（00485）近期攞咗好多寶麗萊嘅品牌嚟做，呢個牌子已經面世咗相當嘅日子，大家好奇佢哋會點樣將佢搞得「後生啲」，升岡主席劉錫康話已經有計仔，可能會搵炙手可熱嘅國際紅星Lady Gaga做新產品代言人。
劉錫康話，今年三、四月份升岡攞咗寶麗萊品牌嘅電視、DVD等電子產品特許權，尋日仲成功衞冕寶麗萊美加市場嘅數碼影象產品特許權。劉主席講到明要幫寶麗萊改裝，一系列寶麗萊新產品將主打年輕一族。
搵Lady Gaga做代言人
至於代言人，劉主席就叫大家唔使擔心，話說寶麗萊主席同國際紅星Lady Gaga相當熟稔，所以大有機會搵呢位超級紅人做新產品嘅代言人，仲要係明年初拉斯維加斯電子展推出新產品時一齊亮相。
身兼兩馬之主嘅劉主席近排除咗忙於公司業務之外，仲忙於投多隻馬，預算200萬至300萬蚊左右。太子希望劉主席再為「蝦王」家族添一員，搵到隻翻版「靚蝦王」，再榮登馬王之位。
劉錫康（左）揀產品代言人亦有一手，據講寶麗萊大有機會搵國際紅星Lady Gaga做新產品嘅代言人。 資料圖片
Lady Gaga