太子手記：印度「巴菲特」飯局值24萬
股神巴菲特每年拍賣嘅「與巴菲特午宴」吸引全球目光。尋日出現咗印度版嘅「與巴菲特午宴」，話說印度股神薩克．金君瓦拉（Rakesh Jhunjhunwala）為咗做慈善，模仿巴菲特，喺eBay網站競投同股神食飯時間，經過九十次出價後，最終以140萬盧比（約24萬港元）成交。
網站講，呢位印度股神將與最多九位客人共膳三小時，地點係一間五星級酒店，午宴目的係為兒童慈善組織籌款。佢喺飯局期間會提出投資建議。
炒股興趣源自父親
呢位印度股神戰績彪炳，最經典一役係，曾經準確地預測印度股市係○八年一月份會大跌。而佢對股票有興趣係源自爸爸，小時候，佢曾見到爸爸經常同朋友一邊飲酒一邊傾股票，所以對股票產生興趣，二十五歲時佢開始買股票，而佢其中一名啟蒙老師就係有「末日博士」之稱嘅麥嘉華。
呢位股神買股票時，會睇一間公司嘅盈利模式、成長潛力及生命力，佢話一家企業最重要係其競爭力、規模和管理品質。
印度股神薩克．金君瓦拉舉辦飯局為兒童組織籌款。 資料圖片