期指攻略：按兵不動 靜候QE2

上周五美國PMI（採購經理指數）勝預期，股市未及反映，尋日輪到中國公布十月份PMI升0.9個百分點去到54.7%，比賓架估計的52.9%好，亦係連續第三個月上升，令一直擔心中央冷卻房地產炒風做得過火，影響內地第四季經濟表現的投資者鬆了一口氣，中港兩地股市同時強勁反彈，港股的升勢也大大超乎筆者預期。

恒指尋日升556點，報23,652點，期指低水幅度收窄，升663點，報23,636點，值得注意是十一月期指開23,250點後扶搖直上，全程無出現過60點以上的回吐。筆者已有心食胡，將上星期23,650點開的淡倉平掉，唔博QE2前後的波動，可惜最後都挾到23,500點先可以成功止賺，又一次見財化水。

成交未算配合升勢

上周五恒指低位去到22,880點回頭，基本上已滿足大市由20,372升到23,866點，整個升浪的0.236調整最低要求（23,042點），QE2前夕，可以一日間上破10日及20日線，市況之反覆，做好做淡風險同樣唔低。現貨重返23,470至23,800點的橫行阻力區，然而，撇除新股友邦（01299）及雅士利（01230），尋日成交大約800餘億元，未算配合大市超過2%的升勢，惟恐尋日反彈是一次走勢陷阱，筆者決定QE2前，按兵不動，除非期指收市企穩23,874點樓上，確認整個升浪未完才跟勢。