股海實戰：長城科技 受惠產業政策

內地製造業數據理想，帶動滬綜指重上3,000點大關，港股跟隨A股高開，之後由頭升到落尾，恒指高位曾見23,656點，收報23,652點，升556點，大市成交910億元。資金喺重大消息公布前偷步入市，睇嚟股市升勢真係停不了！

促使A股高收，主要係十月份PMI連續第三個月回升，達54.7%，環比上升0.9個百分點，顯示經濟增長勢頭良好，未來可望繼續保持穩快增長。滬綜指昨日收報3,054點，升75點，技術上，若今次反彈能持續企穩喺3,000點樓上，下站目標上移至3,180點。

昨日本港中資金融股有好表現，平保（02318）、國壽（02628）及財險（02328）同升逾3%；內銀股中行（03988）、招行（03968）及建行（00939）亦同升逾3%。論短線走勢，阿莊認為季度業績表現理想嘅中行及中信行（00998）都追得過，其中中行目標上望5.1元，中信行目標反覆向年初高位6.75元推進。

阿莊早前提及可以喺業績公布前留意吸納港交所（00388）嘅機會，上周五曾低見166.7元，可惜未有行動，低位一瞬即逝，昨日該股反彈，最高見179.4元，收報178.9元，升4.87%。至於話會睇位上車嘅新股友邦（01299），見昨日即將獲納入MSCI指數嘅消息未能撐住股價，結果逆市跌0.22%收市，報23元，照睇都係要收一浸貨先至大郁，所以都係忍一忍，等低啲先至上車。

回說恒指，上周五大家都唔做唔錯，昨日大戶擺明挾淡倉。若然本周美股真係走高，相信周內恒指試衝24,000點嘅可能性甚高，唔信大市會升，最多翹埋雙手唔做嘢，亦唔好同錢作對。

聯想業績前可留意

碧斯唱好美股，話聯儲局推QE2之後美股可再升一成，並特別睇好科技股。究竟準唔準，好快就知道。講到科技股，昨日聯想（00992）表現突出，高位見5.19元，收報5.18元，升3.19%，成交1.36億元。公司將於本月十日宣布業績，相信其電腦及手機銷售都會有唔錯表現，業績前後可留意低吸機會。

另一隻可以留意嘅科技股乃長城科技（00074），昨日高位見3.95元，收報3.91元，升5.39%，成交3,691萬元。近年長城科技積極強化自主品牌業務及EMS電子製造服務業務兩個引擎，成效逐步顯現，而喺嚟緊嘅「十二五」規劃中，訊息產業乃七大戰略新興產業之一，相信公司可以乘產業政策利好之便，一展所長。

再睇股價走勢，今年四月多次受制於4.8元水平後展開大跌浪，直插落五月份低位2.66元才止跌，成功考驗250日線承接，之後反覆回揚，50日線見支持，若過去數月一浪高於一浪嘅趨勢延續，目標可向4.3至4.5元進發，穿3.7元止蝕。

戰報

恒芯中國（08046）

志強喺十月廿二日建議吸納嘅恒芯中國，昨日最高曾見1.03元，較推介當日低位0.784元，最多升31.3%。

中國無線（02369）

阿May喺十月廿二日介紹中國無線，早前又獲高盛看好，推介當日最低位3.86元，昨日高位見4.35元，升12.6%。