期指攻略：淡倉食胡目標 23000樓下

經過前日急跌超過400點，港股在期指結算日仍然係反彈無力，即使美股前晚跌過百點後，收市跌幅大為收窄，但港股仲係無動於衷，恒指尋日升46點，報23,210點，成交縮減，得番760億元，係十月份最低成交的一日。

人民幣兌美元繼續回吐，執筆時見6.6878，是接近三個半星期低位，美匯指數在76至77水平支持初步形成跌唔落，似乎炒QE2推出及人民幣升值的熱錢，有鳴金收兵之勢，情況對處於高位的股市，有點不利。

即市阻力多關卡

十月期指尋日以23,205點作結，而十一月期指的即市阻力位有一浪低於一浪的感覺，23,240點、23,210點、23,160點，一級級落，最後以23,112點，大低水98點收市，全日都無力逼近既定的23,270點止賺位，教筆者的沽盤坐得安心。

觀乎外圍，下周三美國議息，知道QE2規模有幾大之前，股市仲要過多幾關，包括尋晚嘅美國第三季GDP、PMI、十月消費信心終值及下周初的ISM指數。在利好消息消化得七七八八，成交開始減少下，視乎23,099點支持未必係銅牆鐵壁，23,030至23,090點的食胡目標，都可能稍嫌保守，筆者決定先維持手上一半「晒士」的淡倉，主觀覺得今次調整，現貨好大機會見23,000點樓下。