股海實戰：中海集運估值有望上調

十月期指結算，乃繼九月後又一個月以升市作結，受得起「金九銀十」嘅美譽。展望十一月市況，阿莊唔覺得美元有條件彈得去邊，而中美兩國財金高官最近對話之後，唔排除一、兩個月後，北京又會做啲嘢加快人民幣匯改。參考六月份嘅市況，股市可以睇升，若然呢個推斷冇錯，十一月上旬大市落番23,000點樓下，又可以撈貨等過肥年。

現貨方面，恒指昨日高低波幅僅154點，收市報23,210點，升46點，大市成交縮減至760億元，都係嗰句，美國宣布重要經濟數據、議息以及推QE2在即前，投資者一於唔做唔錯。本來阿莊都想入場短炒東瑞製藥（02348），誰知見到隻新股四環醫藥（00460）首日掛牌股價一步到位，前日炒醫藥股嘅炒家們當堂縮晒手，故打消了入市念頭。

上實城開等好消息

周二買入嘅中新地產（00563）已易名為上實城市開發，昨日曾高見4.02元，收報4元，升1%。相信嚟緊母公司上實（00363）會着手整合上實城開與本身嘅房地產業務，以釐清分工，彰顯協同效益，故可耐心等候資產重組消息。

內地官方傳媒披露，五中全會通過「十二五」規劃內容，建議提出未來五年要使城鄉居民收入普遍較快增長，努力實現居民收入增長和經濟發展同步。喺咁嘅大前提之下，意味着嚟緊內地同胞嘅消費能力亦會隨着收入增長而得到進一步提升，這可為持續推動內需、刺激消費提供動力來源。但當然，企業盈利增長才能支持勞工成本上升，資產價值上升才能製造財富效應。若然未來五年內地如期實現到規劃目標，阿莊深信期間A股市場將有可觀升幅，投資組合押注中資股唔會有錯！

受惠全球貿易復甦

中海集運（02866）宣布第三季度業績，季度純利21.54億元（人民幣．下同），同比增長2.11倍，今年首三季度純利則為33.25億元，表現較市場預期為佳，故見昨日股價走高，全日高位3.18港元，收報3.13港元，升3.99%，成交額5.08億港元。

業績理想，主要受惠全球貿易復甦，刺激集裝箱市場運輸需求，令貨量和運價均得到大幅提升。由於末季為行業傳統旺季，加上美國又即將推出新一輪量化寬鬆政策，經營環境可持續好轉，故料中海集運全年度業績將可扭轉去年嘅虧損局面，向股東們報佳音。

截至九月底止首三季度，中海集運嘅每股收益為0.2847元，保守估計全年度純利介乎45億至50億元，即現價預測市盈率僅單位數字，驟眼睇坊間投行對中海集運評價普遍過於悲觀，相信喺重估潮帶動下，股價可有好表現，博上試五十二周高位3.67港元都幾唔錯，止蝕位2.85港元。

戰報

蒙古投資（00402）

志強十月四日推介蒙古投資，昨日在大成交配合下，最高升至0.22元，較推介當日低位0.174元，升逾26%。

+26%

先施（00244）

錢進昨日指，先施現價可追落後，走勢果然對辦，由全日低位0.89元升至高位見1.1元，最多升逾23%。

+23%