新地年報 標註權益爭議
新地（00016）非執行董事郭炳湘「捍衞」佢喺家族基金中權益事件，係城中熱話，新地尋日出咗今年六月止嘅○九年年報，太子發現年報都有提及，但就同往年有啲唔同，雖然仍舊話該批約10.65億股新地嘅家族基金股份，新地視作郭老太鄺肖卿同郭氏三兄弟嘅權益，但另外有近1,609萬股新地，就講明無郭炳湘份。
年報又提到，早前郭炳湘知會新地，話佢並不察覺任何情況，導致佢名下1,174.38萬股新地被轉讓或終止，並原文照搬郭炳湘申報嘅原有權益，同註明郭炳湘涉及該十億幾股新地同107萬股新意網（08008）正在爭議中。
勤開會 袍金照舊
期內新地開咗四次董事會議，作為非執董嘅郭炳湘出席三次，比○八年更勤力，佢嘅非執董袍金無加到，都係13萬元，兩位細佬郭炳江及郭炳聯加咗唔夠5%，都係二百幾萬。