王傳福失首富十級跌

比亞迪（01211）業績差引發基金大洗倉，老闆王傳福嘅身家自然係大縮水。根據《福布斯》尋日公布嘅二○一○中國富豪排行榜，佢已經由舊年嘅首富，跌到落第十位，取代佢成為今年內地首富嘅，就係娃哈哈集團董事長宗慶后嘞。個榜應該喺「事發前」完成，如果比亞迪個價唔爬番上去，睇怕王傳福明年可能跌出十大。

宗慶后居福布斯榜首

宗慶后喺胡潤同福布斯嘅富豪榜都係「最有錢嗰個」，但福布斯公布佢嘅身家有80億美元，計番人仔就比胡潤少33%。坐第二把交椅嘅係百度董事長李彥宏，身家72億美元，福布斯計嘅反而比胡潤多咗33.6%。

睇番福布斯公布內地最有錢嘅400個富豪，佢哋嘅財富總值激增34.7%至4,230億美元。而上榜嘅身價至少要有4.25億美元，比舊年難咗好多。擁有10億美元以上嘅內地富豪，今年增至128人，喺全球僅次於美國。

內地十大富豪最有錢嘅女性，係排第八嘅龍湖地產（00960）董事長吳亞軍，身家達47億美元。喺胡潤榜高踞第三位嘅玖龍紙業（02689）董事長張茵，福布斯計出嚟只排第三十三位。

元計同比下跌9.1%，其中歐洲市場銷售跌14.5%，亞太區及北美分別增加28.5%及4.8%。