股海實戰： 北控水務 茁壯成長

即月期指結算在即，港股繼續喺高位搓波，大市成交額降至800多億元，指數波幅細，成分股冇得炒，炒家轉移視線炒作個別板塊。繼中資汽車股後，零售股接力向上，英皇鐘錶（00887）、耀萊（00970）及景福集團（00280）等零售股人氣旺盛。

除了零售股之外，靜咗一排嘅電訊設備股亦有買盤追捧，見中國無線（02369）收報4.29元，升11.43%，成交達到6.75億元；晨訊（02000）跟炒，股價曾高見1.76元，收報1.71元，升5.56%。不過，有大行籲沽出京信通信（02342），見昨日該股未有跟炒，收報9.3元，跌1.27%。

阿莊話昨日擬沽出信義（00868）獲利，昨日遂以平均價6.26元沽出15萬股，獲利21.6萬元。同日再以平均價3.74元買入中新地產（00563）15萬股。

股海時不時會出現一些令人難以理解嘅事。好似昨日睇到中鐵建（01186）份復牌通告，真係睇到眼都凸埋，原來公司突然停牌，係交代旗下沙特麥加薩法至穆戈達莎輕軌項目將發生大額虧損，估計金額達41.53億元人民幣之巨！

睇番中鐵建○七年及○八年度純利分別係24億及41億元，去年比較好，賺74億元。如今公司單單一鋪就虧掉超過四十億元，真係翹埋雙手唔做嘢都冇咁傷，作為小股東，當然覺得好難接受！

中鐵建貴為內地大型基建公司，何解計算一個工程項目嘅成本可以出現如此大誤差，管理層係咪應該要接受問責，相信呢啲都係小股東急切想問嘅問題。雖然公司表明已向項目業主遞交索賠資料，但阿莊估計，索賠之路漫長，

中鐵建元氣大傷

今年公司業績好大機會受到重大拖累。粗略估計昨日公司A、H股市值合共唔見約80億元，足以反映市場憂慮，恐怕喺索賠有結果前，暫難叫投資者重拾信心。

又講番阿莊持倉嘅股票，中國燃氣（00384）昨日復牌，並宣布配售7.18億股，當中3.3億股屬先舊後新，其餘屬新股，發行價同為4.31元，集資額30.97億元，用於減債。事實上，內地已進入加息周期，公司趁市旺喺股市進行集資減債，出發點可以理解。昨日該股收報4.38元，跌4.58%，會繼續持有。

講完燃氣股，又睇番隻水務股，北控水務（00371）最近宣布以7.2億元人民幣，收購貴陽水務45%股權。阿莊相信，是項收購貫徹公司嘅擴展策略，有助擴大收益基礎，並增加在中國西部的市場份額，消息正面。

北控水務昨收報2.65元，跌0.75%。今年上半年公司純利已達到1.4億元，相信全年業績可實現雙位數字增長，論估值現價仍屬吸引，向下2.3元水平支持力強，向上主要阻力位在3至3.2元區域。

戰報

彩虹電子（00438）

錢進喺上周四建議買入彩虹電子，預期盈利增長持續，昨日高見1.51元，較當日的低位1.3元升逾16%。

國際精密（00929）

冼金基喺十月十一日指，國際精密半年業務將更好，昨日股價最高見1.16元，比推介當日最多升13.7%。