Esprit印度建村幫貧童

大家都知道善心係無分國界同種族嘅，Esprit思捷環球（00330）班高層最近就去咗印度嘅孟買，幫國際慈善組織SOS成立一個新嘅兒童村。Esprit仲搵到榮獲奧斯卡提名嘅女星瑪姬佳蘭賀，同佢演員老公彼得沙士格共同擔任慈善計劃嘅全球親善大使添。

SOS兒童村計劃係想防止父母親棄養孩童，同埋幫助嗰啲已經畀人遺棄嘅細路獲得居所，連嗰啲因為貧窮而被迫分離嘅家庭，亦可以再重聚。原來Esprit早喺○八年已經致力推廣呢項計劃，今次集團行政總裁范德施（Ronald van der Vis）仲聯同親善大使，一齊為新嘅兒童村進行揭幕禮。

呢幾年Esprit已經喺印度收養咗140個小朋友，仲建立咗14個由新家庭組成嘅村落，所有費用都係Esprit全額資助㗎。

門市擺巨鼓「敲響愛心」

Esprit打算向呢個新嘅兒童村捐款50萬歐元，但就要大家幫吓手嘞。

由下個月初起，公司會喺全球11個城市嘅門市度擺個超級巨鼓，等大家去「敲響愛心」，仲有網上虛擬巨鼓，一樣可以敲。當全球嘅鼓聲累積夠300萬次，Esprit就會將善款投入兒童村。Ronald話，咁做係想同顧客共享慈善嘅熱忱喎。