股海實戰：中海發展經營環境向好

內地股市發威，滬綜指突破3,000點大關，並以接近全日高位收市，報3,051點，升幅2.5%，兩市主板成交超過4,400億元人民幣。睇嚟上周股指期貨大幅高水係有原因。如無意外，年底前滬綜指可反覆向去年高位3,400點水平推進。

港股昨日亦係唔多跌得落，恒指高開後持續向上，全日高位23,781點，收報23,627點，升110點。基本上，現時恒指向下睇23,000點，向上睇24,000點，即波幅區1,000點，但一旦確認突破24,000點，唔排除會引發新一輪補倉潮，屆時大市升勢或明顯加快。諗過度過，阿莊認為暫可維持持倉水平，繼續放紙鳶！

呢期阿莊嘅持倉表現唔錯，九月底以平均價4.78元買入嘅信義玻璃（00868），昨日曾高見6.42元，收報6.33元，升7.47%，新高完再新高。但畢竟累升幅度實在唔細，會睇位食胡，套現所得考慮再增持上海實業（00363）或買入旗下嘅中新地產（00563）。

此外，手持另一隻股票中國燃氣（00384）昨日停牌，據聞係擬配股集資約30億元。阿莊唔止一次講過，內地燃氣市場增長前景佳，加上中燃已發展至一定規模，嚟緊業績表現及購併消息，將繼續帶動股價走高，相信今次配股亦唔愁冇捧場客，呢隻股可以長線睇好，看官別錯失搭尾班車嘅機會。

回說昨日A股升勢，有色金屬、能源及煤炭股成主導。事實上，美元弱勢未改，若然下月初聯儲局宣布嘅量化寬鬆措施力度較市場預期強，美元勢必進一步轉弱，商品市場炒風會更加熾熱，炒家加大力度押注相關股份理由充分。

電力股未係撈底時

另一方面，隨着中央針對個別行業落實限電限產令，九月份全社會用電量環比下降12%，回落幅度高於去年同期5個百分點。難怪喺今次升浪之中，電力股始終未成氣候。有鑑於今年係「十一五」規劃最後一年，中央力促地方政府實現減排目標，喺咁嘅大前提下，現階段仲係唔使急住入市炒底電力股。

兼營乾散貨及油品運輸嘅中海發展（01138），今年上半年營業額同比增34.2%至55.28億元（人民幣．下同），純利9.79億元，增幅59.5%。公司昨日宣布第三季數據，此前見到摩根大通喺上月底入場增持該股，相信亦係出於睇好其下半年嘅營運表現。

近期國際油價回升，將刺激油品運輸需求，加上時近年尾嚴冬將至，內地取暖用煤需求增加，旗下乾散貨運輸業務亦將步入傳統旺季。可見，公司兩大主營業務經營環境向好，喺雙輪驅動之下，相信年底前股價可反覆試高。若短線股價有波動，宜把握入市機會，昨日收市價11.94元，建議喺11元邊上車，年底目標見13至14元，跌穿10元關止蝕。

戰報

浪潮國際（00596）

錢進十月八日推介的浪潮國際，走勢呈強，昨日最高見過0.77元，較推介當日的低位0.65元，最多升18%。

+18%

興達國際（01899）

史提芬十月十五日建議追入嘅興達國際，走勢果然對辦，推介日低位7.27元，昨日高見8.56元，較低位高出17%。

+17%