陸庭龍換人仔先知先覺
即將喺下個月頭榮升恒生（00011）私人銀行及信託服務主管，現任恒生投資服務顧問董事陸庭龍（Alan），絕對係一名投資高手，除咗平日喺好多媒體上分析市場走勢同分享投資心得外，原來自己都會投資埋一份，仲要係比市場行先一步，實行身先士卒攞第一手投資經驗。
換足幾個月儲彈藥
好似近期人民幣匯價頻創新高，好多投資者都紛紛將手上港元兌換人民幣，然後投資唔同嘅人民幣產品，太子八到，Alan原來早喺今年一月嗰陣，已經開始設定每日兌換2萬蚊人民幣的指令，連續換咗幾個月，以儲定人民幣彈藥用作投資。
Alan話，換定啲人民幣，主要係睇好人民幣升值前景，同埋考慮到人民幣存款息率較港元存款吸引咁話。其實，人民銀行今年六月中先宣布重啟匯改，人民幣匯價隨後先展開升浪，Alan今年初已先知先覺投資人仔。