太子手記：張近東膺內地零售首富
呢幾年《胡潤零售富豪榜》嘅頭兩把交椅，畀國美（00493）大股東黃光裕，同蘇寧電器董事長張近東玩晒。根據胡潤最新嘅統計，二○一○年由張近東以304億元（人民幣．下同）嘅身家蟬聯首富寶座，力壓財富只有160億元嘅黃光裕，兩者相差近倍。
身家多黃光裕近倍
雖然佢兩個喺排行榜唔係阿一就係阿二，但係張近東嘅身家一年內多咗接近30巴仙，而黃光裕只得14巴仙，你可以想像身陷囹圄嘅黃光裕幾難發圍喇。
一向同蘇寧爭餐飽嘅國美，依家人哋嘅市值已係國美近三倍嘞，就算大家分店差唔多，蘇寧今年上半年就比國美多賺一倍。加上國美內戰未平，睇怕黃光裕都唔得閒計較自己仲係咪零售富豪榜嘅首富喇。張近東一向帶挈高層有錢齊齊搵，公司有5個人入咗富豪榜，國美從來就只得黃光裕佢自己。
今年零售富豪榜終見到阿里巴巴（01688）主席馬雲嘞，佢以50億身家首度上榜，排第14位。
蘇寧電器董事長張近東再登《胡潤零售富豪榜》榜首。 設計圖片