股海實戰： 海天國際 有條件開快車

二十國財長和央行行長會議曲終人散，會後聯合公報指與會各國同意唔打貨幣戰，但市場關注嘅人民幣匯率問題，則未見有提及，一般估計有待十一月中G20首爾高峰會時再進行討論。據講昨日美國財長蓋特納已隨即訪華，與中國副總理王岐山會晤，相信二人話題不離匯率及貿易問題。講到底，兩國主動積極溝通係好現象，應該毋須過於憂慮。

另一方面，由於下月初美國中期大選及聯儲局議息，一般估計聯儲局即將推出新一輪量化寬鬆貨幣政策，料此前環球股市將繼續高企。港股方面，本周四即月期指結算，「金九銀十」成定局，期指將喺高位結算，暫看十一月市況，未有明顯轉淡迹象。

近月中港股市交投明顯放大，唔少券商都因而重估港交所（00388），繼法巴及中金將其目標價調高至200元樓上後，高盛最近亦表示，預期明年港股平均每日成交額將增至1,200億元，並將港交所嘅目標調高至221元。

此外，市場消息指，新加坡交易所擬向澳洲交易所提出全面收購，看來區域交易所之間嘅競爭勢必白熱化，故見坊間亦開始有港交所與上交所謀合併之類嘅建言，建議可行與否係次要，但區內同業購併消息，以及行業前景展望向好之下，照計港交所股價亦可順勢睇好，下月十日宣布業績前後，可留意上車機會。

至於A股市場，十月十八日滬深兩市合計成交額達到4,886億元人民幣，刷新歷史紀錄。股市成交放量，除了因為大量押注人民幣升值嘅熱錢流入之外，內房市場喺中央全力打壓之下冇作為，迫使大量民間閒置資金由內房轉戰A股市場搵食。

愈近年尾鑊氣愈濃

人行既要防熱錢，又要抗通脹，仲要兼顧保持經濟增長，咁多矛盾，真係唔易做！阿莊相信咁複雜嘅問題，唔可以喺短時間內解決，但對投資者嚟講，有「危」才有「機」，尤其係愈近年尾，投資者趁市況炒多幾轉搵銀過肥年嘅信念會愈來愈強，看官宜把握機會，好自為之！

個股推介方面，從事製銷注塑機業務嘅海天國際（01882），今年上半年業績標青，純利同比大增逾三倍至4.53億元人民幣，引發市場重估，多家大行予以另眼相看。

再睇股價走勢，自上月下旬衝破7元後轉為沿10日線橫行整固，上周五有異動，見歷史新高8.3元，收報8.04元，升0.63%。阿莊相信，以其現價預測市盈率十二至十三倍，明年預測市盈率約十倍計算，估值仍具吸引力，股價大有條件再開轉快車。若然成功起動，呢轉目標直指9元大關，跌穿7.5元止蝕。

戰報

信義玻璃（00868）

積奇十月十三日指信義玻璃盈利前景佳，上周五股價高見5.95元，相對推介日低位5.26元，跟足最多可賺13.12%。

海信科龍（00921）

錢進本月十四日介紹海信科龍，果然無介紹錯，上周五最高曾見4.53元，較推介當日低位3.94元，高出14.97%。