內櫳面積計價最啱數

Paul少上個禮拜預測過，嚟緊呢一季，將有唔少換樓嘅購買力，會因為喺股票市場賺咗錢，於是走出嚟市場搵樓，upgrade一下自己嘅生活，令到第四季中價同埋上價樓嘅成交，將會迅速轉旺。睇嚟一班發展商亦都係「英雄所見略同」。頻頻部署推出手上嘅中價樓盤，希望可以食住呢一轉成交升浪。

有人會認為，政府嚴格規管「發水樓」，令到嚟緊嘅新盤變番實用啲，同時間亦都會將近排推出嘅「末代發水新盤」比下去，銷情可能會受到影響喎。不過，Paul少認為，啲新盤嘅購買力，唔會因為咁樣就「窒步」。因為香港嘅物業設計，大體上都有個「譜」，減少發水之後，發展商亦都會喺樓價度反映番出嚟。商業社會，始終都係「羊毛出自羊身上」，千祈唔好諗住啲樓會突然間「抵」咗嘅。

嚴格規管是好事

政府嚴管「發水樓」，對置業者嚟講始終都係好事。起碼班發展商唔好愈嚟愈離譜，置業者亦都可以更加清楚自己買咗啲乜。其實Paul少都贊同要規管，但係規管並唔等於好似「林鄭」咁講，睇唔到有乜需要起個尊貴大堂。

事實上，既然買樓係想upgrade自己嘅生活，點解畀錢買樓，唔可以買埋嗰少少「虛榮」啫。買家更加會話：「雖然我層樓唔係乜嘢豪宅，但係唔等於我屋企樓下，就要好似公屋大堂咁啫。」呢個世界，如果發展商肯提供呢啲「虛榮嘢」畀買家，而買家又buy嘅話，咁點解又會「睇唔到有乜需要」呢。

Paul少同大家都好清楚，「發水樓」嘅真正問題，並唔係喺啲發水面積同埋「金碧輝煌」嘅公共空間度，呢啲都不過係物業嘅「包裝」，包得靚自然多人鍾意，係無可厚非；政府當初開綠燈，畀發展商豁免環保露台面積同埋增加大堂面積，都係希望單位同埋物業嘅公共空間更加好啫，現在又何必要返番轉頭呢。

其實，「發水樓」問題愈嚟愈大，主要都係因為發展商將啲發水面積，都計埋入個單位度攞出街賣，變相益咗佢哋之餘，亦都令到啲單位嘅實用率愈嚟愈低。

助買家直接比較

所以，如果以後賣樓，不論樓價同埋報出嚟嘅面積，都一律規定以單位內櫳面積嚟計算（留意係「內櫳面積」，唔係「實用面積」，即係連啲主力牆都唔計在內），咁已經可以解決咗啲問題，同時亦都可以令到買家對自己所買嘅新盤內櫳更清楚，亦都可以將不同嘅單位作直接比較。