渣打嘉年華 大跳日舞
渣打香港每年都會舉辦藝趣嘉年華。話明嘉年華，宣傳攻勢就梗係要夠噱頭及富趣味性，咁先可以吸引多啲人注意。舊年佢哋喺分行推出扭蛋機，太子都扭咗幾隻，今年佢哋就主攻facebook平台，邀請各界一齊大跳「日舞」（Sun Dance），實行嚟個先聲奪人。
今年渣打藝趣嘉年華會十一月十三日及十四日喺維園舉行，全場人會齊跳「日舞」，感受嘉年華氣氛。為咗令大家對「日舞」有多啲認識，渣打特登開設專頁，畀大家上載自己同朋友嘅相，等佢哋化身成卡通人物，製作個人化嘅「日舞」卡通短片，然後轉發畀親友添。
導師落分行教跳舞
除此之外，渣打亦希望將嘉年華氣氛散播畀員工，所以日前就請咗舞蹈導師去到分行及員工餐廳，率領員工跳番餐。前線員工難得可以喺工作間度舒展一下筋骨，聽落都幾好呀！