麥博士做投資名正言順
「新興市場之父」麥博士（Mark Mobius）近排改咗Title（職銜），由鄧普頓資產管理執行主席改咗做鄧普頓新興國家投資團隊執行主席，令人聯想起已屆七十三歲嘅麥博士係咪想逐步淡出，為他日退休鋪路。
太子八到，原來今次轉Title，係麥博士嘅主意，佢覺得自己一向都係做投資，而唔係做行政嘅工作，新Title畀人更加清楚佢嘅工作範圍。
講真，鄧普頓全間公司都係做新興市場投資，麥博士係「最高領導人」，Title係點，唔影響佢嘅地位，的確佢原來嘅Title亦都無人頂上。
自言無諗過退休
麥博士講過，自己好鍾意做投資，無諗過退休，亦無好似股神巴菲特咁安排繼任人，因為佢哋基金係team approach（團隊投資模式），加上每個投資市場都已經有得力嘅基金經理，就算佢退休都唔影響基金嘅運作。
計太子話，麥博士加入咗鄧普頓二十幾年，應該已經將功力傳晒畀助手啦。