期指攻略：大漲小回 格局未變
自人行周二突然加息後，市場擔心九月份通脹有噴井式上升，但最終結果，反映唔少人同筆者一樣，係諗多咗。由尋日數據，內地應該無迫切加息需要，人行此舉，有可能只為配合調控樓價升得太急太快的措施。
尋日港股走勢都算蠱惑，恒指兩次假突破上試23,730點不果，收市回順至23,649點，升92點，即市低位23,450點，跟10日線23,477點相當接近，市況擺出一副升唔上又跌唔落的悶局姿態，可是一連兩日試10日線，最後收市都企穩樓上，短炒者可視之為即市支持，一旦跌穿，恒指有機會回試番23,099點水平。
整體而言，港股大漲小回的格局未變，尤其內地未必會連續加息，好倉客可先放下心頭大石。筆者依然看好後市，但在嚴重超買下，不作出止蝕位作保險，則是盲目兼愚蠢的行為，故23,565點揸的好倉，續以23,450點為止蝕。
