張忠謀從來無OT
恒隆集團（00010）主席陳啟宗先幾日喺台北話，喺香港冇乜人識全球都敬佩嘅企業家台積電董事長張忠謀。梗唔係喇，太子就係佢嘅頭號粉絲，尤其敬佩佢工作咁多年，都堅持每周工作最多五十個鐘嘅原則。
要有效率做「啱」嘢
放眼全球，OT文化喺各大城市盛行，港人更加係表表者喇。張忠謀早前就同大家分享佢打工嘅理念，就係「有效率」咁做「啱」嘅嘢。佢話波士有八成責任決定邊啲係啱嘅嘢，但做嘢有冇效率，個人就有八成責任。
自從出嚟社會工作，呢五十幾年來，張忠謀好自豪咁話，「無論係做基層工程師，定係總經理、董事長，我每個星期嘅工作時間都唔超過五十個鐘」。但佢好坦白講畀大家知，佢都曾經變咗個工作狂。就係佢啱啱去德州儀器做嘢嘅頭半年，因為睇到立功上位嘅機會，而呢半年亦成為佢「唯一嘅例外」嘞。
放工後做乜？張忠謀就揀咗一邊聽音樂，一邊睇書，而佢太座就喺旁邊畫畫。呢啲咪係生活情趣囉，第日返工都醒神啲。