滙豐舞后退而不休

有「滙豐一姐」之稱、現任滙豐私人銀行亞洲CEO王以智即將榮休，今年底生效。講開夢妮卡．王，大家對佢一姐嘅印象應該唔會陌生，佢喺四年前用1.2億元天價請拉丁舞王學跳舞，但因為導師態度惡劣而入稟索償學費，全城引為談論。

不過，嚴格嚟講，夢妮卡今次離職其實係「退而不休」，佢雖然唔做滙豐私人銀行亞洲區一姐，但佢仍然會做該公司嘅非執董。

記得月初「滙豐一姐」喺灣仔藝術學院搞咗個慈善晚宴，除咗請嚟倫敦頂尖舞蹈家，仲有千億新抱徐子淇出席。由此可見一姐縱橫商界嘅交際手腕，當然與佢家族顯赫、係已故船王王國桐個女亦都有多少關係。

轉做非執董 原職一分二

根據滙豐嘅通告，夢妮卡原先嘅職位明年會一分為二：目前大中華地區私人銀行市場主管廖淥波會升任成為新嘅私人銀行北亞區主管；而目前新加坡私人銀行市場主管Nancie Dupier就會出任新嘅私人銀行東南亞區主管。至於歐洲、中東及非洲區嘅新任私人銀行行政總裁，就會由Alexandre Zeller 接任。佢哋三人喺私人銀行嘅業務都會直接向環球私人銀行行政總裁 Chris Meares 匯報，而Chris亦將配合滙控（00005）東移亞洲的策略，好快就會搬嚟香港office返工。但環球私人銀行嘅總部仍然會保留喺歐洲，睇嚟佢遲啲要喺歐亞兩地穿梭，做「太空人」周圍飛。