股海實戰：農行無包袱成優勢

人行前日傍晚突然調高存貸基準利率0.25個百分點，本來預期A股及港股均現震盪，誰知A股低開高走，表現令人喜出望外，滬綜指見全日低位2,942點後反覆回升，結果倒升2點收市，報3,003點，可見加息雖來得突然，但加幅並未左右到熱錢流向。

恒指昨日最多跌456點，但受惠A股強勢，跌幅逐步收窄，收報23,556點，僅跌207點，大市成交增加至1,179億元。大價股中，內地保險股被視為加息受惠股份，故見中國人壽（02628）逆市走高，曾高見36.65元，收報36元，升3.15%，成交高達73.7億元，其他保險股如中國太保（02601）、中國太平（00966）及中國財險（02328）升幅分別為5.3%、4.5%及2.4%，平保（02318）則升0.17%。

加息有利內銀股

阿莊認為，人行比預期早作出加息決定，主要係出於對通脹管理嘅考慮，反而某程度亦顯示當局對經濟復甦前景具信心。另一角度睇，雖然今次加息幅度有限，但進入加息周期，負債較高嘅內地企業勢必受到影響，而加息令炒賣成本上升，亦可與其他調控內房市場措施相呼應，故見昨日內房股受壓，負債較高嘅富力地產（02777）及綠城中國（03900）同跌逾5%，首創置業（02868）及雅居樂（03383）分別跌逾7%及6%。

其實，論內地加息受益股，除了保險企業投資收益有望增加之外，內銀股亦有一定程度受惠，事關今次係對稱加息，銀行業淨息差將可擴大。不過，見昨日內銀股個別發展，農行（01288）、建行（00939）、民行（01988）及中信行（00998）股價逆市上升，升幅介乎0.2至1.9%，而工行（01398）、交行（03328）、招行（03968）及中行（03988）跌幅介乎1.1至2.3%。

短線波動候低吸

本來，當日農行上市，唔少人（包括本人）都唔敢抱太大希望，誰知上市後該股表現較預期為佳，見大行積極入市增持農行股份，以現價4.13元計，較招股價3.2元高出29%，股價「冇包袱」，反成優勢。若然嚟緊業績真係說明農村經濟帶動整體業務增長高於同業平均水平，股價有望脫穎而出，短線股價有波動，反可留意低吸嘅機會。

回說投資組合，早前阿莊炒過一轉田生集團（08136），亦係贏錢離場，誰知近周股價如坐火箭，沒有參與其中，頗感遺憾。周二阿莊話隻中航科工（02357）可以睇位加注，呢次唔再手軟，昨日以平均價3.93元增持16萬股，結果隻股收報4.16元，升4.26%；另一方面就以平均價3.37元沽出天能動力（00819）20萬股，獲利3萬元。

戰報

英皇鐘錶（00887）

姚午齊本月八日指英皇鐘錶股價隨時再發力，昨日創五十二周高位0.95元，較推介當日低位0.84元，升13.09%。

中國趨勢（08171）

志強又有好介紹，周二推介的中國趨勢，股價昨日高位見過0.047元，較周二低位0.041元，升14.63%。